නොබලා ඉන්නයි තිබුණේ!

Anna Davis  විසින් ලියන ලද You shouldn’t have watched the news on TV නම් කෙටිකතාවේ පරිවර්තනයකි, මේ. එය ගින්නෙන් වූ විනාශයක් ගැන වුවද ඉතා පහසුවෙන් ජලයෙන් වූ විනාශයක් ගැන වන්නට ද පුළුවන. 

     

           

ඔයාට රූපවාහිනියේ ප්‍රවෘත්ති බලන්නෙ නැතිව ඉන්නයි තිබුණෙ. ඒත් දැන් ප්‍රමාද වැඩියි. ඔයා ඒගොල්ලන් දැකලා ඉවරයි. දුමින් වැසී ගිය ගිනිගෙන විනාශ වූ ගොඩනැගිල්ලෙන් ඉවතට දුවන ඒ මිනිසුන්, ඔයා වගේම පුංචි දරුවන් ඔයාට දැකගන්න පුළුවන් උනා.

බෙරිහන් දෙමින් දුවයන ඒ අය, විශේෂයෙන් ඔයා තරම්ම ළමයි දැකලා ඔයා බය උනා. ඒවා බලන්නෙ නැතිව ඉන්න තිබුණනන් තමයි හොඳ කියලා ඔයාට හිතුනා. රෑට හීනෙන් ඒ ගොල්ල පේන්න පුළුවන්. එහෙම හීන දැක්කම බය හිතෙනවා. ඔයාගෙ කුඩා අත්වල තියන පුංචි රෝම කෙළින් වෙනවා. 

ඒත්, පොඩ්ඩක් ඉන්න. ගොඩනැගිල්ලට මොකද උනේ? කවුද ඒක කළේ? මොකටද? 

ඔයා ඔයාගේ අම්මයි තාත්තයි දිහා බලනවා. ඔයාගේ ඇස්වලින් ප්‍රශ්නයක් නැගෙනවා: අම්මේ, අපිට මෙතැන පරිස්සමක් තියනවද? අපේ ගෙදර එහෙම උනොත් තාත්තා අපිව රැකගනියිද? ඔයාගේ දෙමව්පියන් ආපසු හැරිලා ඔයා දිහා බලන ගමන් හිතනවා ඔයාට මේක බලන්න නොදී හිටියනං හොඳයි කියලා. එහෙම නැත්නම් සමහරවිට මතක හිටින්නත් එක්ක බලනඑක හොඳයි කියලා හිතනවත් ඇති. 

ඔව්, ඔයාට මතක තියේවි.

පුංචි පිරිමි ළමයාගේ ලේ සහ කුණු තැවරී තිබුන  ඔයාගෙ වගේම මුහුණ. 

මිනිසුන්ගේ පාද, ඔව්, පාද විතරයි. සෙලවෙන්නෙ නැතිව බිම වැතිරිලා තියනවා. එක සපත්තුවයි ඉතිරිවෙලා තිබුණේ. 

මිනිසුන් දෙදෙනෙකු දෙපසින් අල්ලාගෙන සිටි අර ගැහැණිය ඇගේ දෙඅත් දිගුකරනවා විනාශ වූ ගොඩනැගිල්ල දෙසට. ඇගේ උමතු දෑස් සොයනවා ගොඩනැගිල්ලේ සුන්බුන් විසින් ගිලදැමූ කුඩා සිරුරක්. ඒත් ඒක නිෂ්ඵල බැල්මක්. 

ඔයාට තවත් මතක තියෙයි බිම වැතිරී සිටින හිසකෙස් නැති ළමයි ටිකක්. (රූපවාහිනියේ ඉන්න මිනිසා කියන්නේ ඒක ළමයින්ගේ රෝහලක් කියලා) ඔවුන්ගේ සිහින් අත් අමුතු උපකරණයකට සම්බන්ධ කර තියනවා කිලිටි සුදු කබා හැඳගත් දොස්තරලා විසින්. 

ඒක නම් ඔයා බලන්න ඕනැ නැති හරිම අස්වාභාවික දර්ශණයක්. මීට වැඩිය හොඳයි ඔයා ගිහිල්ලා ඔයාගේ බෝනික්කා එක්ක සෙල්ලම් කරනවා නම්. බෝනික්කාට පුළුවන් සුදු කබායක් ඇඳගත් දොස්තර කෙනෙක් වෙන්න. එයා අනෙක් බෝනික්කන්ව බේරාගනියි. සමහරක් හිසකෙස් නැතිව වැටිලා ඉන්නේ.