විනිශ්චය xvii

 

                                                  පරිච්ඡේදය 11

                                                  දෙවන කොටස

ඔහු පිටතට පැමිණ බන්දේසිය පසෙක තබා දොර වසා දැමීය. ඔහු හිස් බන්දේසිය ආපසු බාර දුන්නේ රෝස් කෑම ආවරණය කර තිබූ රෙදි වැස්මවත් ඉවත්කර බැලීමට උනන්දුවක් නොගත් බව සිහි කරමිනුයි. ඔහු කළේ මස් කැබැල්ල දෙස බැලීම පමණකි. ඩියැක් ගැන ඇතිව තිබූ කෝපය කොතෙක් ද යත් සැඟවූ ආයුධයක් ඇත්දැයි දැනගන්නට  කෑම බඳුන කූරු ගා බලන්නටවත් ඔහුට කල්පනා උනේ නැත.   

හිස් කෑම බඳුන රෝස් වෙත ආපසු බාර දෙන අතර ඔහු,  "ජොනීට දෙන්න හදපු කෑම එක්ක වෙන මොකවත් දාලා දුන්නේ නෑ නේද, රෝස්?" යයි විමසා සිටියේය. 

ඇය අදහාගත නොහැකි විශ්මයකින්, "ෂෙරිෆ් බක්, මොකක්ද ඒකෙ තේරුම? මොන වගේ දෙයක්ද? මම එයාට වහ දාලා දෙයි කියල ද හිතන්නේ?" යයි පවසා සිටියාය. 

"ඇත්තටම නෑ, රෝස්. ඒක අමතක කරලා දාන්න." හිස දෙපසට සලමින් ඔහු පැවසීය. 

හෝටලයෙන් පිටවූ ඔහු වීදිය දිගේ ගඟ දෙසට ඇවිද ගියේය. අනවසර පදිංච්කරුවන් නැවත ඔහුට පහර දෙන්නට නොපැමිණෙනු ඇතිය යන සිතුවිල්ල අප්‍රසන්න ලෙස ඔහුගේ සිතෙහි රැව් දුන්නේය. පසුගිය වතාවේ ඔහු ගිනි අවිය පාව්ච්චි කරන්නට පසුබට වුවද තව දුරටත් එසේ පසුබට වන සිතක් මෙවර ඔහු තුළ නොවී ය. මීලඟ පැය දහසය තුළ අපාචේ ජන්ක්ෂන් හි සාමය රැකගත හැක්කේ නිතිය කඩ කළ හොත් එහි පූර්ණ ප්‍රතිවිපාක ඔවුන්ගේ හිස් මත පතිතවන බව අදාල පාර්ශවවලට ඒත්තු ගැන්වීමෙන් පමණකි. 

දුම්රිය මග හරහා ගිය ඔහු ගව ගාල් සමූහය අතරින් යද්දී ඉන් එකක ගාල්කර සිටි ගව රංචුවක් ඔහු දෙස බලා සිටියේය. කඳවුරෙහි වූවන් නගරය වෙත ඒම නිසා සෑදුන අඩිපාර දිගේ ඉදිරියට ගිය ඔහුට කඳවුර අද්දර දී රූෆස් කින්කේඩ් මුණ ගැසුනේය. 

"ඔබ හරි මෝඩයෙක්, ආපහු මෙහාට එන්න." කින්කේඩ් පැවසීය.

 "මේ පලාත ඇතුලේ මට කැමති තැනකට මම යනවා." බක් පිළිවදන් දුන්නේය.

 "මොනවද ඔබට ඕනැ කරන්නේ?"  

බක් සිනා මුහුණක් පෙන්වීය. "හොරෙන් පන්නගෙන තිබ්බ ආයුධ දෙකක් අරන් මැක්ග්‍රාත් මගේ ඇඟට පැන්නම අපි දෙන්නා අතර පොඩි ගැටුමක් ඇති උනා. මට අත දිග හරියේ ආයුධයකට කියලා තිබ්බේ වැසිකිලි භාජනය විතරයි. දැන් මැක්ග්‍රාත්ට ඇඳුම් මාරු කරන්න වෙලා තියනවා."

 "බොහොම සතුටින් වාගෙනෙ ඒක කියන්නේ." 

"සමහර විට එහෙම වෙන්න පුළුවන්. ඔය බැල්ලිගෙ පුතා මගේ කකුලට වෙඩි තියලා අතටත් පිහියෙන් ඇන්නා. මිනිහට ඒකට හරියන්න ලැබුනේ ගෙඩිගැහිච්ච ඔලුවකුයි, කැඩිච්ච අතකුයි, වැසිකිලි භාජනේ තිබුන ඒවයින් නාන්න උන එකයි විතරයි. මම හිතන්නෙ මිනිහට ලේසියෙන් ගැලවෙන්න ලැබුනා කියලයි."

"ඔහොම නතර වෙලා ඉන්න. මම මිනිහට දෙන්න ඇඳුම් ටිකක් අරන් එන්නම්." බෙරි කරගත් මුහුණින් යුතුව පැවසූ කින්කේඩ් ආපසු හැරී පැල්පත්, ඒවාට යා කොට බාන ලද වහල, කරත්ත හා කූඩාරම් අතරින් නොපෙනී ගියේය. බක් එලන් දැකගැනීමේ අරමුණික් වටපිට බලමින් පසුවුව ද ඇය පෙනෙන්නට නොවීය. විනාඩි පහකට පමණ පසු කින්කේඩ් ආපසු පැමිණියේ පොදියකුත් අතැතිව ය. ඔහු සිටගෙන බලා සිටි මුළු කාලය තුළම කඳවුරු වැසියන්ගේ කෝපාන්විත ඇස් ඔහු වෙත යොමුව තිබෙනු ඔහුට දැනුනේ ය. පොට්ටනිය අතට ගත් ඔහු එය වම් අතට යටින් කිහිලිගන්නාගෙන නගරය දෙසට ආපසු හැරුනේය. 

කඳවුරු වැසියන් රැස්විමක් පවත්වන බවට හැලිබර්ටන් පැවසූ වදන් ඔහුගේ මතකයට නැගින. ඈතින් කවුරුන් හෝ රැස්ව සිටින පිරිසකට  කතා කරන අයුරින් හඬ නගා කෑ ගසනු ඔහුට ඇසුනේය. එහෙත් ඔහු ආපසු නොහැරී රෙදි පොට්ටනිය වම් කිහිල්ලේ තබාගෙන දිගටම යන්නට ගියේය. ගව ගාල් අතරින් රිංගමින්, දුම්රිය මග හරහා ගොස් නමක් නොමැති ප්‍රධාන වීදියට පිවිසි බක්ට කවුරුන් හෝ සිරගෙදර ඉදිරිපිට සිටගෙන සිටිනු පෙණින. ඈත සිට බලන විට ඒ හන්ටර් විනිසුරුවරයා බවට කෙරුනු අනුමානය නිවැරදි බව ලංවන විට ඔහුට වැටහිණ. 

හන්ටර් කෝපයෙන් මුහුණ රළු කරගෙන සිටියේය. "කොහෙද මෙච්චර වෙලා ගිහින් හිටියේ?"

බක්ට තම කෝපය උතුරා යනු දැණින. "මැක්ග්‍රාත්ට පිරිසිදු ඇඳුමක් ගේන්න අනවසර පදිංචිකරුවන්ගේ කඳවුරට ගියා." 

"මැරෙන්න ඉන්න එකාට? ඒකට පිරිසිදු ඇඳුම් ඕනද?" 

උරහිසින් ඔහු පසෙකට තල්ලු කර බක් දොරගුළු විවෘත කළේය. "ඇතුළට එනව නම් මම සම්පූර්ණ කතාවම කියන්නම්." ඔහුගේ බිරිඳ මැක්ග්‍රාත්ට පිස්තෝලයක් ගෙනැවිත් දුන් බව හන්ටර්ට පැවසීමට බක් නොඉවසිල්ලෙන් පසුවිය.ඔහු සාමාන්‍යයෙන් ඇයට හානියක් නොවන බවට වගබලා ගැනීමට ඉඩ තිබුණ ද කකුලින් නැගෙන  දරා ගැනීමට අපහසු වේදනාව විසින් ඉඩලීන් ඇයගේ ස්වාමියාගේ කෝපයෙන් ගලවා ගැනීමට වූ ඉඩකඩ අහුරා දමනු ලැබ තිබිණ. 

පළමුව ඔහු ගෙනා පිරිසිදු ඇඳුම් මැක්ග්‍රාත් වෙත ගෙන ගියේය. සිරකුටි පෙදෙසින් නැගුන දුගඳ යම් පමණකින් අඩු වී තිබුණ ද තවමත් දුර්ඝන්ධය සම්පූර්ණයෙන්ම පහව ගොස් තිබුණේ නැත. සිතට දැනුන නුරුස්නා හැඟීමක් ද සමග ඔහුට සිතුනේ මැක්ග්‍රාත්ගේ පෙම්වතියන් නිදන කාමරයකින් නැගෙන සුගන්ධය සිර කුටියෙන් අපේක්ෂා කරන්නේ නම් ඔවුන්ගේ බලාපොරොත්තු කඩවන බවයි. කරන්නට හැකිව තිබූ සෑම දෙයක්ම ඔහු කරන ලද අතර තවත් ඒ ගැන වෙහෙසීමට තරම් පිස්සුවක් ඔහුට නොතිබිණ.

ස්තූති කිරීමකුදු නොමැතිවම මැක්ග්‍රාත් ඇඳුම් ටික අතට ගත්තේය. ඔහු තවමත් සුරුට්ටුව පත්තු තරගෙන නොතිබුණි. එසේ කර තිබුනා නම් බක්ට එහි සුවඳ දැනිය යුතු ය. බොහෝ විට කවුරුන් හෝ ඔහු බලන්නට එන විට පත්තු කරගන්නට තබාගත්තා විය හැකි ය. මැක්ග්‍රාත් ඇඳුම් මාරු කරගන්නා තෙක් බක් නැවතී බලා සිටියේය.

 මැක්ග්‍රාත් ඇඳ සිටි ඇඳුම් යකඩ කූරු අතරින් කොරිඩෝවට විසි කළේය. "මේව අරන් තියන්නද, විසි කරන්නද?" බක් විමසීය. "මම යන්ඩ යන දිහාට ඕවා ඕනැ වෙන්නෙ නෑනෙ, නැද්ද?" මැක්ග්‍රාත් පිළිවදන් දුන්නේය. 

මැක්ග්‍රාත්ගේ සරදම් ස්වරයට සවන් දුන් බක්, "තවමත් එහෙම වෙයි කියලා විශ්වාස කරන්නෙ නෑ නේද?" යි ඇසීය. 

"මං මැරෙන එකද? අමුතුවෙන් කියන්න ඕනද, හැමෝම මැරෙනවනෙ." 

"මං කියන්නෙ හෙට දිනය ගැන." 

මැක්ග්‍රාත් උරහිස් හැකිලීය. බක් දුගඳ හමන ඇඳුම් ඉදිරි දොරටුවෙන් එළියට ගෙනගොස් හිරගෙදර පිටුපස තිබූ අළු දමන වලට දැමීය. ඔහු ආපසු පැමිණෙන විට හන්ටර් නඩුකාරයා නොඉවසිලිමත් ලෙස තම සැරයටියෙන් මේසයට තට්ටු කරමින් සිටියේය. ඔහුගේ මුහුණෙහි පිළිකුල දැක්වෙන ඉරියව්වක් දක්නට තිබිණ. "මිනිහට මොකද උනේ? වැසිකිලිය ඇතුලෙවත් වැටුනද?" 

"මම කියන්නම් හරියටම මොකද උනේ කියලා. ඔබේ බිරිඳ මැක්ග්‍රාත්ට පිස්තෝලයක් ගෙනත් දුන්නා. ඒ මදිවට ජෙනී කාල්සන් පිහියක් මැද්දට දාපු කේක් එකක් ගෙනත් දුන්නා. මම ඇතුලට යනකොට මිනිහා මගේ ඇඟට කඩාගෙන  පැන්නා. අන්තිමේදී මගෙ කකුලට වෙඩි වැදිලා අතට පිහිය ඇනුමක් ලැබුනා. මිනිහට ඔලුවෙ ගෙඩියකුයි, කැඩිච්ච අතකුයි, වැසිකිළි භාජනේ ඇඟ පුරා හලාගන්නයි ලැබුනා." 

"හිරකාරයෙකුට හොරෙන් ආයුධ සපයන්න ඉඩදෙනවට වැඩිය මොලේ පාවිච්චි කරලා වැඩ කරන්නයි ඔබෙන් බලාපොරොත්තු වෙන්නේ." 

බක් ඔහු දෙස දෑස් ලොකු කරගෙන බලා සිටියේය. විනිශ්චයකාරයා විරුද්ධ කරගැනීම මෝඩ ක්‍රියාවක් බව වැටහුන ද ඔහු තවදුරටත් ඒ ගැන සැලකිල්ලක් දැක්වූයේ නැත. 

"කෙනෙක් කොහොමද හරියට කරන්නෙ කියන එකට ඔහේ නම් අපූරු උදාහරණයක් තමයි, නැද්ද?"

හන්ටර් කෝපයෙන් රත් පැහැයට හැරිණ. "මොකක්ද ඒ කියපු කතාවෙ තේරුම?" 

බක්ගේ සිතෙහි දෙගිඩියාව පැවතියේ මොහොතක් පමණි. "පලවෙනි කාරණේ තමුසෙ වාගේ නාකි අවජාතකයෙක් තමන්ගෙ දුවගෙ වයසෙ ඉන්න තරම් තරුණ ගෑනු ළමයෙක් කසාද බඳින්නෙ නැතිව ඉන්නයි තිබුනේ." 

හන්ටර්ගේ මුහුණ මළමිනියක මෙන් සුදුමැලි පැහැයට හැරිණි. ඔහු තදකරගත් දෙතොල් විවර කර කතාකිරීමට උත්සාහ කළත් මුවින් කිසිවක් පිටවීමට පෙර බක් නැවතත් පෙරට පැන්නේය. "දෙවෙනි එක තමයි තමුසෙ ඉඩලීනුයි මැක්ග්‍රාතුයි ගැන දැනගෙන හිටිය හින්දා නඩුව අහන එකට නුසුදුසුයි කියලා අයින් වෙන්න තිබුනේ."

"තමුසේ හොඳටම දන්නවා මමයි මේ පලාතටම ඉන්න එකම …"

"එහෙම නං තමුසෙට යුතුකමක් තිබුනා මිනිහට විරුද්ධව නිවැරදි චෝදනාවට නඩුව අහන්න."

"එහෙම තමයි කළේ. ගැලොවේගෙ අතටම අහුඋනා ඉඩලීන් එක්ක ඉන්නවා. මිනිහා බය උනා ගැලොවේ කතාව පතුරුවයි කියලා ඒක තමයි ඔහේට ඕනෑ චේතනාන්විත මිනීමැරීමේ චෝදනාව."

"ඇයි එහෙමනං ඒක නඩු විභාගයේදී මතුකළේ නැත්තේ?" 

"මිනිහෙක් තමන් ගැන හැම දෙයක්ම එළියට දාන්න ඕනැද?"

විනිසුරුවරයා පිළිබඳව බක්‍ගේ සිතෙහි කිසිදු අනුකම්පාවක් ඇතිවූයේ නැත. තමන්ට වඩා බෙහෙවින් ලාබාල වූ කාන්තාවක් හා විවාහ වීමෙන් ඔහු කරගෙන ඇත්තේ බලවත් වරදකි. ඉන් සිදුවූ අවමානය මකාගැනීම සඳහා ඔහු තම තනතුර අවභාවිතා කිරීමෙන් ඔහු විසින් ආරක්ෂා කිරීමට බැඳී සිටින යුක්තිය යන වචනය ද සමච්චලයට ලක් කර ඇත.

"ඔහේට තවමත් පුළුවන් වැරැද්ද නිවැරදි කරන්න. ව්‍යර්ථ නඩු විභාගයක් ප්‍රකාශයට පත්කරලා වෙනත් කොහේ හරි විනිශ්චයකාරයෙක් ඉදිරියට මැක්ග්‍රාත් පමුණුවලා නඩුව නැවත අහන්න සලස්වන්න. සාක්ෂි හැම එකක්ම එළියට  එන්න ඉඩ දෙන්න."  

"මොකක්ද ඒකෙන් ඇතිවෙන වෙනස? කොහොමත් එල්ලලා මරන්න නියම වෙන එකයි වෙන්නේ. ඇයි ඉතින් හෙටම මිනිහට මැරෙන්න ඉඩ දෙන්න‍ෙ නැත්තෙ?"

"තමුසේ කොහොමද ඕයි නඩුකාරයෙක් උනේ?" බක් පෙරලා පැවසීය. 

හන්ටර් විනිශ්චයකාරයාගේ මුහුණ නැවතත් පාට වැටුනේය. "හෙට මරණීය දණ්ඩනය ක්‍රියාත්මක කිරීමක් සිදුවෙනවා. මම ඒකට නියෝගය දිලයි තියෙන්නේ. ඔබ අරන් තියන පියවර මොනවද ඒක ගැටුම් ඇති නොවී නිසි පරිදි ක්‍රියාත්මක කරන්න?"

"යකාට ගියාවේ! මොනවද ඔබ යෝජනා කරන පියවර?" බක් ප්‍රතිඋත්තර දුන්නේය. 

"මම කොහොමද දන්නේ? ඔබයි මේ ප්‍රාන්තයේ ෂෙරිෆ්. ප්‍රාන්තයේ නිතිය ආරක්ෂා විම ගැන වගබලා ගන්න ඕනෑ ඔබයි. ගවහිමියෝ දිව්රලා කියනවා නියමවෙලා තියන විදියට මැක්ග්‍රාත් මැරෙනවා කියලා. කඳවුරුවල ඉන්න මිනිස්සු කියනවා මිනිහට මැරෙන්න දෙන්නෙ නෑ කියලා. නගරවැසියන්ට ඕනෑ නගරයේ වීදි දිගේ යුද්ධයක් ඇවිලෙන එක වළක්වාගන්න." 

"ඔය ඔක්කොම කල්පනා කරන්න තිබුනේ මැක්ග්‍රාත්ට තීන්දුව දෙන වෙලාවේ. දැන් බහිනවා මෙතැනින් එළියට. තමුසෙත් එක්ක බැණගන්නවට වැඩිය මට තව වැඩ තියනවා කරන්න." 

විනිශ්චයකාරයාට හෘදයාබාධයක් වැළදෙතැයි බක්ට සිතුණි. කිසිවෙකු මීට පෙර ඔහුට මෙලෙස කතාකර නැතුවාට සැක නැත. හන්ටර් නඩුකාරයා දොර මහ හඬ නැගෙන සේ වසා දමමින් පාරට පිවිස පොරයට සූදානම් වූ පොර කුකුළෙකු සේ පෙරට ඇදී යනු බක් සිහින් සිනාවක් මුවඟට නගා ගනිමින් බලා සිටියේය. 

                                                      * * *