විනිශ්චය - VI

 

               

                  

                                                      පරිච්ඡේදය III

                                        දෙවෙනි කොටස

ඉඩලීන් හා මැක්ග්‍රාත් එකට සිටිනු ගැලොවේට අසුවීම නගරයේ තවත් කීදෙනෙක් දැනසිටියේ දැයි බක් කල්පනා කළේය. නිසැකවම සියළුම ගවහිමියන් හා ඔවුන් යටතේ වැඩ කරන බොහෝ  දෙනෙක් දැන සිටින්නට ඇත. ගැලොවේ ඒ ගැන කතාකරන්නට ඇති අතර ඒ අනුව පුවත පැතිර යන්නට ඇත. නගරයේ නගරවැසියන් සමහරක් දැනසිටින්නට ඇති නමුත් බලෙන් පදිංචි වූ අනවසර පදිංචිකරුවන් කිසිවෙකුත් දැන නොසිටින්නට ඇත. 

බක් නොසන්සුන් ලෙස එහා මෙහා ඇවිදින්නට පටන් ගත්තේය. බක් සිතූ ආකාරයට මේ කරුණ දැනගැනීම ඔහු මුහුණ දී සිටි ගැටළුව විසඳීම පහසු කිරීමේ මගකි. නිසැකවම වියහැකි පරිදි ගැලොවේගේ මිනීමැරුම මැක්ග්‍රාත් විසින් කලින් සැලසුම් කළේ නම් මරණීය දණ්ඩනය නියම කිරීම නිවැරදි වෙයි. 

ඊලඟට ඔහු හිස දෙපසට සෙලවීය. එය ගැටළුව පහසුවෙන් මගහැර යාමකි. මරණීය දණ්ඩනය පිළිබඳ තීන්දුව නිවැරදි වන්නේ නඩු විභාගය නියමානුකූලව පැවැත්වූවා නම් පමණකි. එහෙත් නඩු විභාගය නියමිත පටිපාටියට පවත්වා නැත. චෝදනාවට ලක් වූ මිනිසා කෙරෙහි ද්වේෂයෙන් හා ඊර්ෂ්‍යාවෙන් පිරුනු හන්ටර් විනිසුරුවරයා නඩුව විමසීමෙන් සිය කැමැත්තෙන් ඉවත් වියයුතුව තිබුණි. 

එපමණක් නොව මැක්ග්‍රාත්ට ගැලොවේ මරාදැමීම සඳහා පෞද්ගලික හේතුවක් පැවතීම යන කරුණ ද ඇතුලත් සියළුම සාක්ෂි මත නඩු විභාගය පැවැත්විය යුතුව තිබුණි. මැක්ග්‍රාත්ට එරෙහි තීන්දුව ඉවත දැමිය යුතු බව පෙරටත් වඩා බක්ට අවබෝධ විය. ඔහුට අළුත් නඩු විභාගයකට මුහුණ දීමේ අයිතිය හිමිවිය යුතුය. ප්‍රතිඵලය එයම වන්නට පුළුවන. එය එසේම විය හැකිය. එහෙත් එවිට එය කරුණු මත පදනම්ව නිත්‍යානුකූලව එළැඹි තීන්දුවක් පමණක් නොව නීතියට අනුකූලව තීන්දුව දෙනු ලබන්නේ අපක්ෂපාත විනිසුරුවරයෙකු විසිනි. 

එහා මෙහා ඇවිදීම නැවතූ බක් සිරකුටි වෙතට පිවිසෙන දොර වෙත ගොස් එය විවෘත කළේය. මැක්ග්‍රාත් සිරකුටිය තුළ වූ පටු ඇඳ මත වාඩිවී පොලවට නෙත් යොමාගෙන සිටියේය. බක් දොරෙන් ඇතුල්වන විටම ඔහු හිස ඔසවා බක් දෙස බැලීය. 

"ආච් නෝත්කොට් ඇවිත් ගියා." බක් පැවසීය. 

"ඉතිං?" 

"මම කලින් දැනගෙන හිටියෙ නැති දෙයක් මිනිහ මට කිව්වා. ගැලොවේ මැරෙන්න සතියකට කලින් ඔබ ඉඩලීන් හන්ටර් එක්ක නගරයේ උඩහ කෙළවරේ තියන ගස්ගොන්නෙ එකට ඉන්නකොට ගැලොවේට අහුඋනා කියලා." 

මැක්ග්‍රාත් යළිත් බිම බලාගත්තේය. "මිනිහා බොරුකාරයෙක්." ඔහු පැවසීය. 

"එහෙමද? ඇයි එයා බොරුවක් කියන්නේ මේ වගේ දෙයක් ගැන? විශේෂයෙන් දැන්?"

බක්ගේ කනට ක්‍රමයෙන් හුරුවී තිබූ මිටියෙන් පහර වදින හඬ එක්වරම යළිත් අලුතෙන් නැගුන ශබ්දයක් සේ  ඇසෙන්නට විය. මැක්ග්‍රාත්ගේ කනට නම් එය කෙසේවත් හුරු වී නැති බව පෙනුනේ "ඔබට බැරිද අර වේසිගෙ පුතාලා කරන වැඩේ නවත්වන්න?" යනුවෙන් ඇසූ බැවිනි.

"ඒක හදලා ඉවර කරන්න වෙනවනේ." 

මැක්ග්‍රාත් අත් ඔසවා දෑතින් කන් දෙක වසාගත්තේය. එහෙත් එයින් ඔහු බලාපොරොත්තු වූ තරම් සහනයක් නොලැබුන නිසාදෝ යළිත් අත් පහතට දැමීය. 

"ඒක ඇත්ත නම් ඔබ ගැලොවේ මැරුවේ මිනිහගේ කට වහන්න." බක් කීය. 

"මම ගැලොවේ මැරුවේ ආත්ම ආරක්ෂාවට. මිනිහා උත්සාහ කළේ නිත්‍යානුකූලව මම අයිතිකරගත්ත ගෙවත්තෙන් මාව එළියට දාන්න. මට හිතුනේ මිනිහා මාව මරන්න එනවා කියලා. මම නඩු විභාගයෙදි කීවෙත් ඒකයි. ඒක තමයි ඇත්ත." 

මැක්ග්‍රාත් කළ ප්‍රකාශයේ එක් අඩුවක් තිබුනි. ඔහු එය කරන විට බක්ගේ දෑස් දෙස නොබැලීය. "ඔබ මට කියන්නේ ඇත්ත නම් ඇයි මගේ දිහා කෙලින් බලන්නෙ නැත්තේ?" 

මැක්ග්‍රාත් හිස ඔසවා බැලීය. "දෙයියන්ගේ නාමෙට! මට පුළුවන් ඔහේ දිහා කෙලින් බලන්න." 

"ගැලොවේට අහු උනානේ ඔබ ඉඩලීන් එක්ක ඉන්නවා, නැද්ද? ඔබ බය උනා විනිශ්චයකාරයා ඒක දැනගනී කියලා." 

"මිනිහට අපි අහු උනා, මම බය උනා නඩුකාරයා දැනගනී කියලා. ඒක ඇත්ත තමයි. ඒත් බය උනේ ඒ නාකි බැල්ලිගේ පුතාට නෙමෙයි. මම බය උනේ ඉඩලීන් ගැනයි. හන්ටර් ඊර්ෂ්‍යාවෙන් පිස්සු වැටිලා ඉඩලීන්ට මොනවා කරයිද කියලා හිතාගන්න බැරි උනා. ඇත්ත නම් එයා මිනිහට මාරාන්තික බයයි."

යළිත් වරක් සැකයේ බීජය ඕවන් බක්ගේ සිත තුළ කරකැවෙන්නට විය. මැක්ග්‍රාත් ගැලොවේ මැරුවේ ඔහුගේ කට වසන්නට යයි නෝත්කොට් පැවසූ කතාව විශ්වාස කළ හැකි දෙයකි. එසේම තමන් ගැන සිතනවාට වඩා ඔහු වද උනේ ඉඩලීන් ගැන යයි කියන කතාව ද එලෙසම විය හැකි දෙයකි. කොහොම හිතුවත් නඩුකාරයෙක් තුවක්කුවක් අතට ගෙන තම බිරිඳ සමග සිටියේ යයි අසන්නට ලැබුන මිනිසෙකු සොයා යනු ඇතැයි සිතන්නට අමාරුය. 

කනස්සල්ලෙන් යුතුව ඔහු සිරකුටි පෙලට පිවිසෙන දොර වසාදමා තම කාර්යාලයට පිවිසියේය. මොකට වද වෙනවද? මෙවැනි දේ ගැන තීරණ ගතයුතු පුද්ගලයා ඔහු නොවේ. එහෙත් ඔහුට එතරම් පහසුවෙන් සියල්ලෙන් අත සෝදාගත නොහැකිය. මන්ද යත් උසාවිය තම කාර්යය හරියට නොකළ හේතුවෙන් මරණයට පත්වන්නට යන්නේ එසේ මිය නොයා යුතු පුද්ගලයෙකු වන්නට ඇති  ඉඩ නිසා ය.

                                           

                                                 පරිච්ඡේදය IV

                   

                 

                                                       

                                                      පළමුවන කොටස

    මේ ගැන යළි යළිත් සිතන විට ඕවන් බක්ගේ කල්පනාවට ආවේ තමා මෙන්ම අනවසර පදිංචිකරුවන් ද  මැක්ග්‍රාත් හා ඉඩලීන් හන්ටර් එකට සිටිනු ගැලොවේට අසුවීම පිළිබඳ කිසිත් නොදැන සිටියේ ද යන්නයි. ඔහුගේ සිතට නැගුනේ සත්‍යය දැනගත්තේ නම් ඔවුන්  මැක්ග්‍රාත්ට මරණීය දණඩනය පමුණුවනවාට විරුද්ධවීමට ගෙන ඇති මුරණ්ඩු තීරණය ලිහිල් කරනු ඇති බවයි. 

මේ හෙලිදරව්ව මරණීය දණ්ඩනය පැමිණවීමට ඉඩ නොදීමට බක්ගේ තිබූ අධිෂ්ඨානය දෙදරවීමකට ලක්කර තිබුණි. මීට පෙර ඔහු විශ්වාස කළේ දෙනු ලැබූ තීන්දුව  හන්ටර් විනිසුරුවරයා තම තරුණ බිරිඳ ගැන ඇතිවූ උමතු ඊර්ෂ්‍යාවෙන් පෙළඹී  ගත් කුරිරු හා වැරදි  එකක් බවයි. මැක්ග්‍රාත්ට ගැලොවේ මරාදැමීම සඳහා ප්‍රබල හේතුවක් තිබූ බව හෙලිදරව්වීම වරදකරු බවට තීන්දු කිරීම හා නියම කළ දඬුවම යන දෙකම වැරදි බවට වූ ඔහුගේ විශ්වාසයෙහි වෙනසක් ඇති නොකළ ද මරණීය දණ්ඩනය ක්‍රියාත්මක කිරීමට ඉඩ නොදීමට වූ අධිෂ්ඨානය දුර්වල කළේය. 

එසේ වුවද ඔහු මුහුණ දී සිටි උභතෝකෝටිකයේ බර ඉන් කිසිසේත්ම අඩු නොවීය. එල්ලා මැරීම ක්‍රියාත්මක වුවහොත් හා එය නැවැත්වීමට අධිෂ්ඨාන කරගෙන සිටින අනවසර පදිංචිකරුවන් එම අරමුණෙහිම එල්බගෙන සිටියහොත් එහි ප්‍රතිඵලය වන්නේ අහිංසක මිනිසුන්ගේ ලේ සෙලවීමයි. වීදියෙහි වෙඩිතබාගැනීම් සිදුවනු ඇත. ඉන් අනතුරට පත්වන්නේ තුවක්කු පාවිච්චිකරන්නන් පමණක් නොවේ. ඒ අවට බලාසිටින අහිංසක මිනිසුන්, කාන්තාවන් හා ළමයින් ද තුවාල ලැබීමට හෝ මියයාමට ඉඩ ඇත. 

ඔහු මැක්ග්‍රාත්ට ඇසෙන සේ කෑගසා අවශ්‍ය යමක් වේදැයි විමසා නැත යන පිළිතුර ලැබුන පසු එළියට පැමිණ දොර අගුල් දමා ඉක්මන් ගමනින් වීදිය දිගේ ඇවිද ගියේය. 

  

  






 

11 comments:

  1. මට ඔබේ මේ කථාව කියවද්දී "ෂේන්" පොත මතක් වීම නවත්වන්නට බෑ!

    ReplyDelete
    Replies
    1. ෂේන්ගෙන් මෙය වෙනස්වන අයුරු ඉදිරියේදී බලාගන්න පුළුවන්. නීතිය ක්‍රියාත්මක වන ආකාරය හා බක්ගේ මනස විවරණය ස්වභාවය නිසයි මෙය තෝරාගත්තේ.

      Delete
  2. 👍👍👍👍👍 මයියා

    ReplyDelete
  3. දැන් කතාව හොඳට ගලාගෙන යනවා. 👌🙏

    ReplyDelete
  4. එක දිගටම කියවන් ගියා. අදත් ලස්සනයි .
    ජයවේවා !!!

    ReplyDelete
  5. ඔරිජිනල් කතාවෙත් මැක්ග්‍රාත් අර මිටි සද්දෙ එක්ක දැනෙන මානසික පිඩනය ගැන හෙම ලියවිලා තිබ්බෙ ඔච්චරද.

    වෙනද විදියටම ගලායෑම අපූරැයි!

    ReplyDelete
    Replies
    1. කිසිම අඩුවක් නැතිව පොත සම්පූර්ණයෙන් පරිවර්තනය කරන්නේ.

      Delete
  6. අදත් කතාව හොඳයි. අනේ මන්ද මොනා වෙයිද කියලා. මගේ පහසුව තලා ඔබගේ බ්ලොගය මගේ අඩවියේ එල්ලා ගත්තා. එයට ඔබේ අකමැත්තක් නැතැයි සිතමි.

    ReplyDelete
    Replies
    1. ස්තූතියි. ඉවසීමෙන් ඉමු නේද මොකද වෙන්නෙ බලන්න.

      Delete